„Eins hægt að segja að við séum að sækja um hjá Manchester United“

„Ég fékk símtal frá félaga sem er aðeins innanundir hjá Portsmouth. Heyrði bara í mér hljóðið og var að spá hvort ég ætlaði ekki að sækja um starfið,“ segir Hermann Hreiðarsson.

Enska götublaðið Mirror greindi frá því í gær að Hermann og David James hefðu í sameiningu sótt um laust stjórastarf hjá Portsmouth. Hermann segist vissulega hafa heyrt í James eftir að hann fékk símtalið að utan. Hins vegar hafi hann ekkert heyrt í kjölfarið frá Portsmouth og eigi ekkert endilega von á því.

„Það væri eins hægt að segja að við værum að sækja um hjá Manchester United,“ segir Hermann léttur. Hann haldi þó öllum dyrum opnum og forráðamenn Portsmouth séu með símanúmerið hans vilji þeir heyra frekar í honum.