Verðmætum skartgripum stolið í Cannes

Þjófar stálu skartgripum fyrir um eina milljón Bandaríkjadollara, eða rúmlega 123 milljónir íslenskra króna, af hóteli í Cannes í Frakklandi aðfaranótt föstudag. Þeir höfðu ekki fundist þegar Fréttablaðið fór í prentun í gærkvöldi.

Öryggisskápur á hótelherbergi á Novotel-hótelinu var tekinn úr herberginu og segir lögregla að þjófnaðurinn hafi verið vel skipulagður. Fulltrúi Chopard, svissnesks úra- og skartgripaframleiðanda, gisti í herberginu. Chopard er styrktaraðili kvikmyndahátíðarinnar í Cannes sem nú stendur yfir og stóð fyrir galaviðburði á öðru hóteli þegar þjófnaðurinn átti sér stað. Fyrirtækið býr einnig til Gullpálmann sem afhentur er fulltrúum bestu myndar hverrar hátíðar.

Aðstandendur hátíðarinnar þvertóku þó fyrir að pálmanum hefði verið stolið, og sögðu hann á öruggum stað. Að öðru leyti vildu þeir ekki tjá sig um málið. Lögreglan segir mjög líklegt að skartgripirnir hafi verið á hótelinu í tengslum við kvikmyndahátíðina, en fulltrúar hennar segjast ekki vita hverjum þeir voru ætlaðir. Nú þegar hafa leikkonan Julianne Moore og fyrirsætan Carla Delevingne sést með skartgripi fyrirtækisins á rauðum dreglum.

Talið er líklegt að þjófarnir séu fleiri en einn og að þeir hafi hafi haft nákvæmar upplýsingar um málið. Talsmenn Chopard vildu ekki tjá sig um málið við blaðamenn í gær en höfðu skipulagt blaðamannafund í gærkvöldi þar sem þeir ætluðu að svara spurningum um málið.