Liverpool hefur hvorki heyrt frá Europol né UEFA

Forráðamenn Liverpool segjast ekki hafa verið í neinu sambandi við evrópsku lögregluna, Europol, vegna Meistaradeildarleiksins gegn Debrecen þar sem búið var að múta markverði ungverska liðsins, Vukasin Poleksic.

Hann átti að hleypa inn að minnsta kosti þremur mörkum í leiknum en Liverpool náði aðeins að skora eitt.

Talsmaður Liverpool hefur staðfest að hvorki Europol né UEFA hafi verið í sambandi vegna málsins enda liggi Liverpool ekki á nokkurn hátt undir grun í málinu.

Það var danska blaðið Ekstra Bladet sem greindi fyrst frá því að leikur Liverpool og Debrecen væri umræddi Meistaradeildarleikurinn sem komst í fréttirnar í gær.

Europol segir að úrslitum hafi verið hagrætt í 680 leikjum á heimsvísu.