Ramsey og Wenger bestir í september

Aaron Ramsey, leikmaður Arsenal, og Arsene Wenger, knattspyrnustjóri liðsins, hafa verið kjörnir besti leikmaður og stjóri ensku úrvalsdeildarinnar í september.

Arsenal vann sigur í öllum fjórum leikjum sínum í úrvalsdeildinni gegn Spurs, Sunderland, Stoke og Swansea. Ramsey, sem hlaut viðurkenninguna í fyrsta skipti, skoraði fjórum sinnum í mánuðinum þar af tvö gegn Sunderland á Ljósvangi.

Wenger er öllu vanari viðurkenningunni enda hlaut hann hana í þrettánda skiptið. Frakkinn fagnaði á dögunum sautján ára starfsafmæli hjá Lundúnafélaginu.

Auk þess vann Arsenal báða leiki sína í riðlakeppni Meistaradeildar Evrópu sem hefur þó ekki áhrif á áðurnefnt kjör sem snýr aðeins að úrvalsdeildinni. Þá komst Arsenal áfram í enksa deildabikarnum.