David James áhyggjufullur

David James, leikmaður ÍBV í Pepsi-deildinni í fótbolta og fyrrum landsliðsmaður Englendinga, hefur áhyggjur af þróun mála í markvarðarmálum í enska fótboltanum.

"Eyjamaðurinn" bendir á það að það séu aðeins þrír enskir aðalmarkverðir hjá liðunum tuttugu sem skipa ensku úrvalsdeildina á komandi tímabili. Þetta eru þeir Joe Hart (Manchester City), Ben Foster (West Brom) og John Ruddy (Norwich).

„Ég hef haft áhyggjur af þessu í mörg ár," sagði David James í viðtali við Press Association.

„Ég trúi því ekki að það leynist ekki fleiri hæfileikamenn þarna úti. Ég held bara að það séu ekki nógu margir þjálfarar eða nógu margir góðir þjálfarar til að ala upp leikmennina okkar," segir James.

David James var ekki á Íslandi um Verslunarmannahelgina og missti því að leik ÍBV og FH á Þjóðhátíð á laugardaginn.