Kári og félagar áfram í deildarbikarnum

Kári Árnason lék allan leikinn með Rotherham United í kvöld þegar liðið sló b-deildarlið Sheffield Wednesday út úr enska deildarbikarnum. Rotherham vann þá 2-1 sigur í leik liðanna á New York Stadium í Rotherham.

Sheffield Wednesday er í deild ofar en Rotherham og þetta er því athyglisverður sigur hjá Kára og félögum og gefur vonandi til kynna að liðið ætli að vera í toppbaráttu C-deildarinnar á tímabili.

Öll mörkin komu í fyrri hálfleik en Sheffield Wednesday lék manni færri síðustu þrettán mínútur leiksins eftir að varamaðurinn Jermaine Johnson fékk að líta rauða spjaldið.

Ben Pringle og Lee Frecklington skoruðu mörk Rotherham United í leiknum en Rhys McCabe jafnaði fyrir Sheffield Wednesday í millitíðinni.