Warnock: Hann féll eins og Drogba

Neil Warnock knattspyrnustjóri ákvað að skella sér í hóp þeirra sem hafa tjáð sig um boltastrákinn sem hélt boltanum frá Eden Hazard leikmanni Chelsea í enska deildarbikarnum í fótbolta og fékk spark í síðuna fyrir. Warnock var ekki hrifinn af framkomu Charlie Morgan.

„Það var athyglisvert að sjá Hazard rekinn útaf. Hann sparkaði greinilega í boltann og hitti elsta boltastrák í sögunni í leiðinni,“ sagði Warnock.

„Ég hugsa að strákurinn hafi fylgst vel með Drogba í gegnum árin ef miðað er við hvernig hann brást við,“ sagði Warnock sem vísaði í leikræna tilburði stráksins sem þóttist stór slasaður af litlu tilefni.

„Þrátt fyrir það reikna ég með að Hazard sætti sig við sína refsingu því hann brást vitlaust við,“ sagði Warnock.