Taarabt lánaður til Fulham

Adel Taarabt, miðjumaður Queens Park Rangers, hefur verið lánaður til grannliðsins Fulham út leiktíðina.

Marokkómaðurinn hafði lýst því yfir við forráðamenn QPR, sem féll úr efstu deild í fyrra, að hann vildi áfram spila á meðal þeirra bestu.

„Þetta var erfið ákvörðun fyrir mig en á þessu stigi ferils míns tel ég mig þurfa að spila á hæsta stigi. Ég vona að stuðningsmenn QPR skilji afstöðu mína og ég vonast svo sannarlega til að snúa aftur á Loftus Road einn daginn."

Taarabt spilaði 150 deildarleiki fyrir QPR. Hann var valinn besti leikmaður liðsins tímabilið 2010-2011 þegar liðið tryggði sér sæti á meðal þeirra bestu.