Jonjo Shelvey: Ég vil biðja stuðningsmenn Swansea afsökunar

Jonjo Shelvey var maður kvöldsins þegar Swansea City gerði 2-2 jafntefli við hans gamla lið Liverpool í Wales í kvöld. Hann átti þátt í öllum fjórum mörkum leiksins, skoraði og lagði upp mörk Swansea og gaf síðan Liverpool tvö mörk eftir skelfilegar sendingar.

„Ég vil bara biðja stuðningsmenn Swansea afsökunar fyrir þessi tvö mistök mín sem gáfu Liverpool jafntefli í kvöld. Mér fannst við eiga meira skilið úr þessum leik," sagði Jonjo Shelvey við SkySports eftir leikinn.

„Ég vildi ekki fagna þegar ég skoraði því ég ber mikla virðingu fyrir stuðningsmönnum Liverpool og elskaði hverja mínútu sem ég var hjá félaginu. Það er samt erfitt að ráða við tilfinningarnar," sagði Jonjo Shelvey en hann kom Swansea í 1-0 á 2. mínútu.

„Við gáfum Liverpool stig í þessum leik en það var frábært að fá að spila þennan leik. Við gerðum mjög vel í að koma okkur aftur inn í leikinn," sagði Shelvey.