Leik hætt vegna áfengislyktar af varadómara

Hætta þurfti leik Colwyn Bay og Altrincham í enska hálfatvinnumannabikarnum í fótbolta þegar sjö mínútur voru eftir og dómari leiksins tognaði á kálfa. Altrincham var ekki klárt með fjórða dómara og hafnaði Colwyn Bay dómaranum sem var valinn úr áhorfandaskaranum.

Altrincham var 2-0 yfir en heimaliðið hafnaði því að dómarinn sem hefur öll tilskilin réttindi fengi að klára leikinn þar sem hann hefði verið að drekka og angaði af áfengi. Ian Senior aðstoðarþjálfari Altincham bauðst til að dæma síðustu mínútur leiksins en því var jafnframt hafnað.

Frank Sinclair sem gerði garðinn frægan í vörn Chelsea og Leicester á árum áður er þjálfari Colwyn Bay og hann sagði við breska ríkisútvarpið að félagið hafi verið í fullum rétti til að hafna dómaranum.

„Þú getur ekki bara fengið hvaða Gísla, Eirík eða Helga til koma inn á og klára síðustu tíu mínútur leiksins,“ sagði Sinclair.

Grahame Rowley stjórnarformaður Altrincham segist vona að heilbrigð skynsemi ráði úrslitum í málinu og liði hans verði dæmdur sigur.

„Við þurfum vonandi ekki kom hingað aftur til að leika síðustu sjö mínútur leiksins. Við réðum lögum og lofum á vellinum. Það ætti að dæma okkur leikinn,“ sagði Rowley.