Denis Irwin: Það mun enginn jafna afrek Ryan Giggs

Denis Irwin, fyrrum liðsfélagi Ryan Giggs, telur engar líkur á því að einhver annar leikmaður nái að vinna fleiri titla en Giggs og sömuleiðis ætti leikjametið að vera nokkuð öruggt líka að hans mati.

Ryan Giggs fagnar fertugsafmælinu sínu á morgun en hann átti mjög góðan leik í gær þegar Manchester United vann 5-0 útisigur á Bayer Leverkusen í Meistaradeildinni. Þetta var 953. leikur hans fyrir United.

Ryan Giggs vann sinn þrettánda meistaratitil með Manchester United á síðustu leiktíð en hann hefur einnig orðið fjórum sinnum bikarmeistari og tvisvar unnið Meistaradeildina.

„Það mun enginn ná að vinna svona marga meistaratitla og það verður erfitt að bæta leikjametið hans líka. Það magnað að sjá hvað hann hefur gert og hvað hann hefur náð að spila lengi hjá svona toppklúbbi," sagði Denis Irwin við BBC.

Denis Irwin og Ryan Giggs unnu saman sjö meistaratitla hjá Manchester United á sínum tíma.