Fundu kviku undir Suðurskauti

Jarðvísindamenn hafa staðfest tilvist kvikuhólfs undir Suðurskautslandinu. Þeir óttast að komi til eldgoss undir kílómetra þykkri íshellunni gæti það valdið svo mikilli bráðnun íss að yfirborð sjávar gæti hækkað.

Kvikuhólfið liggur undir endanum á fjallahrygg sem ber hið einkennilega nafn Framkvæmdastjórnarfjöll (e. Executive Committee Range), að því er fram kemur í umfjöllun vísindaritsins Science.

Fjöllin sem mynda fjallgarðinn eru grafin undir ísnum, og eru fjöllin því yngri sem sunnar dregur. Elsta fjallið er talið hafa myndast fyrir 13,2 til 13,7 milljónum ára, en það yngsta myndaðist á síðustu milljón árum. Talið er að síðast hafi gosið á hryggnum fyrir um 8 þúsund árum.

Mælingar vísindamanna á jarðhræringum á Suðurskautslandinu leiddu í ljós að kvikuhólf er að finna á 25 til 40 kílómetra dýpi. Mælingarnar sýna að jarðhræringunum svipar til hræringa við virk eldfjöll á Havaí

Aðeins risavaxið eldgos gæti orðið til þess að bræða kílómeters þykkan ísinn sem liggur yfir yfirborði jarðar þar sem kvikuhólfið kraumar undir. Minni gos gætu þó brætt gríðarlegt magn af ís, og þar með hækkað yfirborð sjávar.

Ómögulegt er að spá fyrir um hversu mikil slík hækkun gæti orðið, en líklega yrði hún minniháttar að mati Robert Bindschadler, jöklafræðings hjá NASA, bandarísku geimferðastofnunarinnar.