Kynfæri fimm stúlkna limlest á hverri mínútu

Í dag, 6. febrúar, er alþjóðlegur dagur gegn limlestingum á kynfærum kvenna. Alþjóðlega mannréttindahreyfingin Amnesty birtir af því tilefni áhugaverðar staðreyndir í nýju myndbandi.

Þar kemur fram að talið sé að um 180 þúsund stelpum í Evrópu standi ógn af limlestingum. Þá er fjallað um listaverk sem listamenn frá Belgíu, Brasilíu, Ítalíu og Kýpur hafa gert úr undirskriftum þeirra sem vilja aðgerðir í Evrópu vegna limlestinga.

„Þegar stelpa er limlest er henni fagnað með hrósi og gjöfum en sársaukinn og áfallið verður með henni út lífið. Þegar hún fæðir barn rifjast það allt saman upp fyrir henni," segir í myndbandinu.

Fjallað er um alþjóðlega daginn í nýju veftímariti um þróunarmál sem birt er á heimasíðu Þróunarsamvinnustofnunar Íslands. Þar er vísað í frétt á vef upplýsingaskrifstofu Sameinuðu þjóðanna fyrir Vestur-Evrópu:

„Ég sá hnífinn og vissi hvað myndi gerast. Ég hrópaði en fann engin orð," sagði Kady, stúlka frá Burkina Faso, þegar hún lýsti umskurðinum í viðtali við IRIN fréttastofuna. Oft er stúlkum ekki sagt frá því hvað sé í aðsigi til að tryggja að þær hlaupist ekki á brott. Kynfæra umskurður kvenna er stundaður í mörgum Afríkuríkjum auk nokkura ríkja í Asíu og Mið-Austurlöndum. Alþjóðlegur dagur gegn umskurði kvenna er haldinn 6. febrúar á hverju ári í því skyni að beina kastljósinu að þessu máli.

Fram kemur að fjórar tegundir séu af umskurði kvenna en sú grófasta feli í sér að öll ytri kynfæri konunnar séu numin á brott.

„Samkvæmt hefðinni er þetta gert með hníf eða oddhvössu blaði og síðan saumað fyrir með þyrnum eða nál. Engri svæfingu er beitt og lítt eða ekki sótthreinsað. Oftast er aðgerðin framkvæmd af einstaklingi sem nýtur sérstakrar virðingar í samfélaginu og er viðstaddur barnsfæðingar."

Dr Rosemary Mburu, kvensjúkdómalæknir í Kenía telur að um 15% allra umskorinna stúlkna blæði út eða deyi af völdum sýkinga. Hins vegar eru 18% umskurða nú framkvæmdir á heilbrigðisstofnunum og fer slíkt í vöxt. Þökk sé vitundarvakningu í kjölfar herferða Sameinuðu þjóðanna og frjálsra félagasamtaka hefur árangur þó náðst við að vinna gegn umskurði.

Nánar má lesa um málið í nýútkomnu veftímariti Þróunarsamvinnustofnunar Íslands þar sem hægt er að finna hlekki á frekari upplýsingar.