Di Canio lenti í ryskingum við stuðningsmenn Southampton

Ítalinn Paolo di Canio, stjóri Sunderland, lendir oftar en ekki í hlutum sem annað fólk lendir ekki í. Hann lenti í enn einni skrautlegu uppákomunni um helgina.

Sunderland átti útileik gegn Southampton um helgina og á hóteli liðsins var brúðkaupsveisla.

Di Canio lenti í einhverjum útistöðum við drukkna brúðkaupsgesti sem stöðvuðu lyftu sem hann var í til þess að fá mynd af sér með honum.

Það gekk ekki sem skildi því Di Canio hringdi á lögregluna sem handtók engan en gaf fólki þó aðvörun.

Di Canio sagði eftir leikinn að þetta hefðu verið þrír strákar, drukknir stuðningsmenn Southampton. Þeir hefðu haldið lyftunni og ekki hleypt Di Canio og félögum upp til herbergja sinna og viljað fá myndir sem Di Canio nennti ekki að standa í. Þá urðu menn æstir en ekkert brjálað ástand að sögn stjórans.

Þetta vesen varð þó til þess að Di Canio komst ekki til náða fyrr um tvö um nóttina.