Gylfi og Bale ná vel saman - myndband

Gylfi Þór Sigurðsson lagði upp mark fyrir Gareth Bale í 3-0 sigri Tottenham á Internazionale í gær í fyrri leik liðanna í 16 liða úrslitum Evrópudeildarinnar.

Bale skoraði í gær með laglegum skalla eftir frábæra fyrirgjöf frá Gylfa af vinstri kantinum.

Gylfi var að leggja upp mark fyrir Bale annan leikinn í röð því Bale skoraði eftir glæsilega stungusendingu íslenska landsliðsmannsins í sigrinum á Arsenal um síðustu helgi.

Gylfi hafði einnig gefið stoðsendingu á Bale í sigri á Aston Villa á annan í jólum en Bale innsiglaði þá þrennu sína eftir sendingu frá Gylfa.

Þeir Gylfi og Bale eru jafnaldrar (fæddir 1989) og ná greinilega vel saman inn á vellinum. Nú þarf bara Bale að fara jafna leikinn og gefa nokkrar stoðsendingar á Gylfa.

Hér fyrir ofan má sjá myndband með þessum þremur stoðsendingum Gylfa á Gareth Bale.