Flamini æfir með Arsenal

Kunnuglegt andlit gæti fljótlega verið komið aftur í Arsenal-búning en miðjumaðurinn Mathieu Flamini æfir með liðinu þessa dagana.

Flamini var leystur undan samningi hjá AC Milan í sumar og er án félags.

"Hann er að halda sér í formi hjá okkur. Ég vil ekkert segja um möguleikann á því að við bjóðum honum samning," sagði Arsene Wenger, stjóri Arsenal.

Wenger hefur mátt þola mikla gagnrýni fyrir að versla ekkert í sumar og margir stuðningsmenn félagsins hafa fengið nóg af Wenger og vilja hann burt frá félaginu.

Flamini lék með Arsenal á árunum 2004-08 og fór þaðan til AC Milan. Hann á 102 leiki að baki með Arsenal þar sem hann skoraði sjö mörk.