Langþráð endurkoma Fletcher

„Loksins er komið að því. Ég er kominn aftur fyrir fullt og allt. Vonandi markar þessi leikur tímamót,“ sagði Darren Fletcher eftir sigur Manchester United á Aston Villa í ensku úrvalsdeildinni í gær.

Skotinn kom inn á sem varamaður í 3-0 sigri Englandsmeistaranna og tók á því í tuttugu mínútur. Leikurinn var hans fyrsti síðan gegn Newcastle á annan dag jóla í fyrra.

„Ég virðist hafa komist í gegnum mestu erfiðleikana og ég er þakklátur fyrir það,“ segir Fletcher sem glímt hefur við sáraristilbólgu í vel á þriðja ár.

Fletcher var lykilmaður í liðinu sem varð Englands- og Evrópumeistari árið 2008 undir stjórn Sir Alex Ferguson. Mörkin úr sigri United á Aston Villa má sjá í spilaranum hér að ofan.