Engin uppgjöf hjá Darren Fletcher

Darren Fletcher, hinn 28 ára miðjumaður Manchester United, gefur lítið fyrir þann orðróm að hann muni þurfa að leggja skóna á hilluna langt fyrir aldur fram. Fletcher hefur glímt við sáraristilbólgu og kom aðeins tíu sinnum við sögu hjá United á síðustu leiktíð.

„Það er ekki möguleiki að mín mati. Ég vil halda áfram að spila. Ég er fullviss að einn daginn sný ég aftur. Ég er aðeins 28 ára gamall og velti ekki fyrir mér umræðu um að ég þurfi að leggja skóna á hilluna. Ég vil halda öllum möguleikum opnum," sagði Fletcher í viðtali við breska fjölmiðla.

Í umfjöllun Fréttablaðsins í desember síðastliðnum var fjallað um sjúkdóminn sem Fletcher glímir við, sjá hér.

Þar kemur meðal annars fram:

Sáraristilbólga leggst á þarmana og ristilinn og getur haft mikil áhrif á daglegt líf. Helst lýsir hann sér í langvinnum niðurgangi, stundum blóðugum, þreytu, kviðverkjum og í slæmum tilvikum hefur hann einnig í för með sér þyngdartap og hita.

Fletcher segist ekki vera byrjaður að æfa á nýjan leik. Hann hlusti á ráðleggingar lækna og gefi sér tíma.

„Það er erfitt að ræða þetta því veikindin komu svo óvænt upp. Ég verð bara að taka einn daga í einu og í augnablikinu líður mér eins og ég muni snúa aftur," sagði Fletcher.