Gylfi: Óska þess aldrei að menn missi vinnuna

Gylfi Þór Sigurðsson segir að brottrekstur Andre Villas-Boas hafi komið sér á óvart. Hann vonast til að fá að spila meira undir stjórn nýs þjálfara.

Þetta segir hann í samtali við Morgunblaðið í dag. „Ég bjóst ekki við því að hann yrði rekinn en þessir tveir stóru skellir á móti Manchester City og gegn Liverpool um helgina hafa líklega ráðið mestu um að hann var látinn fara,“ sagði Gylfi.

Tottenham tapaði um helgina fyrir Liverpool á heimavelli, 5-0, og Villas-Boas var látinn taka poka sinn á mánudaginn. Hann er ekki sá fyrsti en Tottenham hefur verið duglegt við að skipta um stjóra  síðustu árin.

„Nú vonar maður að það komi einhver góður í staðinn,“ bætir hann við. „Það er kannski svolítið neikvætt að það hafi verið svona margir stjórar á undanförnum árum en það er líka jákvætt að félagið vill mikinn árangur. Það er mikill metnaður til staðar og félagið vill bæta sig.“

Gylfi hefur lítið fengið að spila í deildinni að undanförnu og vonast vitanlega að hann fái fleiri tækifæri undir stjórn nýs stjóra.

„Maður getur aldrei verið ánægður þegar einhver missir starfið sitt en það er nú þannig í þessu að maður vill alltaf fá að spila sem mest,“ segir Gylfi sem er áhugasamur um að fá að spila meira á miðjunni.

„Ég hef spilað svolítið lengi úti á vinstri kantinum sem er ekki alveg mín staða. Það er allt í lagi að gera það í einhvern tíma en ég vona að með nýjum manni þá fái ég að spila meira inn á miðjunni. Ég fékk einn og einn leik í minni stöðu þegar Villas-Boas var við stjórnvölinn, ég hefði viljað fá fleiri í röð.“