Shelvey vill komast til Brasilíu

Jonjo Shelvey, leikmaður Swansea, heldur í vonina um að hann verði valinn í HM-hóp Englands fyrir úrslitakeppnina í Brasilíu næsta sumar.

Shelvey hefur spilað vel síðan hann kom til Swansea frá Liverpool í sumar en hann spilaði einn leik með Englendingum í undankeppni HM. Það var gegn San Marínó.

„Ég vil vera í landsliðinu og allra helst fara með til Brasilíu. Það er undir mér komið að sanna mig fyrir þjálfaranum,“ sagði Shelvey við enska fjölmiðla. „Ef ég held uppteknum hætti er aldrei að vita.“

Shelvey hefur verið fastamaður í U-21 landsliði Englands og vill Hodgson að hann öðlist fremur reynslu þar en að spila í aukahlutverki með A-landsliðinu.

„Þetta sagði hann við mig fyrir tímabilið og síðan þá hefur í raun ekkert breyst. Ég er reyndar kominn með nýtt símanúmer,“ bætti hann við.