Agger: Ég á heima í byrjunarliðinu

Daniel Agger, leikmaður Liverpool, telur sig eiga heima í byrjunarliðinu en hann hefur ekki fengið mörg tækifæri á tímabilinu.

Daninn ætlar sér samt sem áður að vera áfram í herbúðum félagsins og vinna fyrir sæti sínu í hjarta varnarinnar hjá Liverpool.

Agger var í byrjunarliði Liverpool um liðna helgi er liðið valtaði yfir Fulham 4-0 og þótti standa sig nokkuð vel.

„Ég vill spila hverja einustu mínútu í öllum leikjum,“ sagði Agger við fjölmiðla ytra.

„Það er mjög erfitt að vera ekki í liðinu  en ég mun halda áfram mínu striki og sannfæra stjórann að ég eigi heima í byrjunarliðinu. Þar á ég heima þó ég viti að þetta sé allt saman ákvörðun stjórans.“