Obama segir repúblikana nota fjárkúgun

Barack Obama, forseti Bandaríkjanna, segir repúblikana nota fjárkúgun til þess að fá sínu fram, en þeir neituðu að samþykkja nýtt fjárlagafrumvarp vegna deilna um nýtt sjúkratryggingakerfi sem Obama hefur barist fyrir. Í kjölfarið voru um 800 þúsund ríkisstarfsmenn sendir í launalaust leyfi.

Málið hefur verið í pattstöðu síðan í síðustu viku og hefur Obama varað við því að Bandaríkin gætu komist í greiðsluþrot verði skuldaþak ríkisins ekki hækkað fyrir 17. október. Nú setur forsetinn þau skilyrði fyrir áframhaldandi viðræðum að repúblikanar láti af kúgunartilburðum sínum.