Aron: Aldrei séð neinn spila eins vel og Gylfi gegn Albönum

Gylfi Þór Sigurðsson hefur verið frábær að undanförnu bæði með Tottenham Hotspur og íslenska landsliðinu.

Leikmaðurinn gerði tvö mörk fyrir Tottenham um síðustu helgi er liðið bar sigur úr býtum gegn Norwich.

Nú þegar Gareth Bale hefur yfirgefið Tottenham gæti myndast pláss fyrir Gylfa til að láta ljós sitt skína.

Gylfi mætir Aroni Einari Gunnarssyni og félögum í Cardfiff á morgun en leikurinn fer fram í Wales.

„Nú þegar Bale er farinn frá félaginu gæti Gylfi farið að skora fleiri mörk,“ sagði Aron Einar Gunnarsson í viðtali við enska blaðið Sunday Express.

„Það verður erfitt að spila gegn honum og sérstaklega út af því að ég veit hvað hann getur gert inn á vellinum.“

„Gylfi er stærsta stjarnan á Íslandi og hefur sannað sig sem frábær leikmaður í ensku úrvalsdeildinni".



Ísland vann magnaðan sigur á Albönum á dögunum í undankeppni HM og sýndi Gylfi í þeim leik að hann er einn allra besta knattspyrnumaður sem Íslendingar hafa átt. Sjaldan hefur leikmaður leikið eins vel með íslenska landsliðinu og Gylfi Þór á dögunum.

„Ég held að ég hafi aldrei séð leikmann leika eins vel með íslenska landsliðinu og Gylfi gegn Albönum á dögunum. Snertingar hans voru á heimsmælikvarða en okkar markmið eru að komast á HM í Brasilíu.“