Moyes dregur úr væntingum

Eftir erfitt gengi í fyrstu leikjum vekja nýjustu ummæli David Moyes, knattspyrnustjóra Manchester United eflaust ekki upp mikla gleði hjá stuðningsmönnum liðsins. Aðspurður út í möguleika United í Meistaradeildinni var Moyes fljótur að benda á aðra líklegri kandídata.

Eftir 2-1 tap á Old Trafford gegn W.B.A. halda United til Úkraínu þar sem Shakhtar Donetsk eru mótherjarnir. Þetta er fyrsta tímabil Moyes í Meistaradeildinni en lærisveinar hans unnu 4-2 sigur á Leverkusen í fyrsta leik.

Þrátt fyrir að hafa tekið við góðu búi frá Sir Alex Ferguson þá telur Moyes United ekki eiga möguleika á fjórða Meistaradeildartitlinum eins og staðan er í dag.

„Til að vinna Meistaradeildina þarftu fimm til sex heimsklassa leikmenn. Horfðu á Bayern í fyrra, þeir voru með marga sannkallaða heimsklassaleikmenn og til að vinna keppnina þarftu það. Barcelona og Real Madrid eru önnur góð dæmi, þessi lið eru mælikvarðinn fyrir hin liðin. Við erum ekki nógu góðir í dag en við munum halda áfram að bæta okkur. Við erum með gott lið, góða blöndu af reynsluboltum og gæða leikmönnum og vonandi getum við tekið næsta skref," sagði Moyes.