Aron Einar ágengur en jafntefli niðurstaðan

Hull og Cardiff skildu jöfn 1-1 í nýliðaslag á Kingston Communications leikvanginum í ensku úrvalsdeildinni í dag.

Curtis Davies kom heimamönnum yfir í fyrri hálfleik. Peter Whittingham jafnaði fyrir gestina í þeim síðari. Skömmu síðar átti landsliðsfyrirliðinn Aron Einar Gunnarsson skalla úr góðu færi en rétt framhjá.

Aron Einar var óvenju ágengur í leiknum, átti nokkrar marktilraunir, en tókst ekki að bæta við marki frekar en liðsfélögum hans.

Cardiff hefur fimm stig eftir fjóra leiki og situr um miðja deild. Hull er stigi á eftir.