David James og Hemmi eiga milljónir króna inni

Enska knattspyrnufélagið Portsmouth hefur átt í miklum fjárhagserfiðleikum undanfarin ár.

David James, markvörður ÍBV, og Hermann Hreiðarsson, spilandi þjálfari liðsins, eiga inni háar fjárhæðir hjá félaginu. Um er að ræða launagreiðslur sem félagið gat ekki staðið við á sínum tíma.

Samkvæmt frétt The Sun á James inni um 145 þúsund pund eða andvirði 28 milljóna íslenskra króna. Hermann á inni aðeins minni upphæð eða um 43 þúsund pund sem svarar til 8 milljóna íslenskra króna.

Nýir eigendur Portsmouth þurfa að ganga frá launagreiðslum til fjölmargra fyrrverandi leikmanna sinna. Heildarupphæðin er skv. The Sun 6,7 milljónir punda eða sem nemur um 1,3 milljarði íslenskra króna.

Portsmouth spilar í dag í ensku d-deildinni.