Valdi Lambert fram yfir Defoe

Roy Hodgson, landsliðsþjálfari Englands, hefur tilkynnt byrjunarliðið fyrir leikinn gegn Moldóvu í undankeppni HM á Wembley í kvöld.

Mikil meiðsli herja á herbúðir landsliðsins. Ljóst var að Wayne Rooney, Glen Johnson, Alex Oxlade-Chamberlain og Phil Jones gætu ekki spilað. Þá bættist Daniel Sturridge í meiðslahópinn í vikunni en gæti þó náð leiknum gegn Albaníu á þriðjudag.

Rickie Lambert, framherji Southampton, verður í fremstu víglínu með Theo Walcott hjá Arsenal og Danny Welbeck hjá Manchester United á köntunum. Allir þrír voru á skotskónum í 3-2 sigri á Skotlandi í ágúst. Þá skoraði Lambert sigurmarkið í sínum fyrsta landsleik eftir að hafa komið inn af bekknum.

Hodgson viðurkenndi á blaðamannafundi í gær að hafa þurft að velja á milli Lambert og Jermain Defoe í fremstu víglínu. Þar hefði mestu skipt að Defoe hefur aðeins spilað 39 mínútur það sem af er leiktíð á Englandi.

Byrjunarlið Englands verður þannig skipað:

Markvörður: Joe Hart

Hægri bakvörður: Kyle Walker

Miðvörður: Gary Cahill

Miðvörður: Phil Jagielka

Vinstri bakvörður: Ashley Cole

Miðjumaður: Frank Lampard

Miðjumaður: Steven Gerrard (f)

Miðjumaður: Jack Wilshere

Hægri kantur: Theo Walcott

Vinstri kantur: Danny Welbeck

Framherji Rickie Lambert

Leikur Englands og Moldóvu hefst klukkan 19 og verður í beinni útsendingu á Stöð 2 og Stöð 2 Sport 2.