Willian kominn til Chelsea

Enska úrvalsdeildarfélagið Chelsea hefur staðfest kaupin á brasilíska sóknartengiliðinum Willian frá rússneska félaginu Anzhi Makhackala. Leikmaðurinn á þó eftir að fá atvinnuleyfi en það ætti að berast á miðvikudaginn.

Chelsea hafði betur í baráttunni við Liverpool og Tottenham um Willian en hann var við það að ganga til liðs við Tottenham þegar Chelsea blandaði sér í baráttuna.

Kaupverðið er talið vera í nálægð við 30 milljónir punda.

Þrátt fyrir að þurfa að berjast um sæti í liði Chelsea við leikmenn á borð við Juan Mata, Eden Hazard, Oscar, Kevin De Bruyne og Schürrle valdi Willian félagið og þar hafi tækifærið á að leika í Meistaradeild Evrópu leikið stórt hlutverk en hvorki Liverpool né Tottenham verða í Meistaradeildinni í vetur.