Áhyggjulaus þrátt fyrir rýra uppskeru

Michael Laudrup, knattspyrnustjóri Swansea, hefur ekki áhyggjur af stigaleysi liðsins eftir tvær umferðir í ensku úrvalsdeildinni.

Swansea beið lægri hlut 1-0 gegn Tottenham á White Hart Lane í Lundúnum í gær. Liðið tapaði einnig í fyrstu umferðinni gegn Manchester United, þá 4-1.

„Ég hef ekki áhyggjur en ég kann ekki vel við 0-1 tap," sagði danski knattspyrnustjórinn við BBC eftir tapið í gær. Swansea er eðlilega á botni deildarinnar eftir tapleikina tvo.

„Við vitum að mótið er langt og strangt. Það eru ekki leikirnir gegn Manchester United og Tottenham sem munu skilgreina tímabilið okkar."

Laudrup segir að leikurinn gegn West Brom um næstu helgi sé hins vegar afar mikilvægur.

„Við byrjuðum tímabilið frábærlega í fyrra og fengum sex stig úr tveimur leikjum," segir Laudrup. Hann bendir hins vegar á að andstæðingarnir í fyrra hafi verið QPR og West Ham með fullri virðingu fyrir þeim.

„Eftir sjö leik vorum við hins vegar aðeins með átta stig," sagði Daninn og setti stigafjölda Swansea í ár og í fyrra í samhengi.

Mörkin úr leik Spurs og Swansea frá því í gær má sjá í spilaranum hér að ofan.