Liverpool slapp með skrekkinn í deildabikarnum

Liverpool vann 4-2 sigur á Notts County í enska deildabikarnum í kvöld en liðið þurfti framlengingu til að landa sigrinum. Liverpool komst í 2-0 en slakaði á í seinni hálfleik og missti leikinn í framlengingu.

Daniel Sturridge skoraði tvö mörk fyrir Liverpool í kvöld og hefur þar með skorað fjögur mörk í fyrstu þremur leikjum liðsins á tímabilinu.

Raheem Sterling var valinn í enska landsliðið í dag og fagnaði því með því að koma Liverpoll í 1-0 strax á 4. mínútu. Hann fékk boltann langt fyrir utan teig en labbaði framhjá varnarmönnum Notts County og skoraði laglega.

Daniel Sturridge er búinn að skora sigurmörkin í báðum deildarleikjum Liverpool og hann bætti við öðru marki á 29. mínútu þegar hann afgreiddi frábærlega sendingu Steven Gerrard inn í teig. Það leit því allt út fyrir þægilegan sigur Liverpool en annað átti eftir að koma á daginn.

Varnarmaðurinn Yoann Arquin var fyrstur til að skora hjá Liverpool á tímabilinu þegar hann minnkaði muninn á 62. mínútu. Adam Coombes jafnaði síðan leikinn sex mínútum fyrir leikslok og því þurfti að framlengja leikinn.

Kolo Toure fór meiddur af velli í framlengingunni og liðið var búið með allar skiptingarnar og þurfti því að klára leikinn manni færri. Liverpool tókst engu að síður að skora tvö mörk.

Daniel Sturridge kom Liverpool í 3-2 með marki á 105. mínútu leiksins og Jordan Henderson bætti síðan við marki á 110. mínútu.  Liverpool vann því leikinn 4-2.