Þrjú lið áfram í enska deildabikarnum eftir vítakeppnir

Fulham, Tranmere og Birmingham tryggðu sér öll sæti í 2. umferð enska deildabikarsins eftir sigra í vítakeppnum í kvöld. Það var því bara  Crystal Palace sem féll úr leik í kvöld af þeim liðum sem spila í ensku úrvalsdeildinni. Crystal Palace datt út á móti C-deildarliði Bristol City.

Fulham lenti 1-2 undir í framlengingunni á móti D-deildarliði Burton Albion en náði að jafna í 2-2 og tryggja sér síðan sigur í vítakeppninni með því að skora úr öllum fimm vítaspyrnum sínum.

Darren Bent, Bryan Ruiz, Sascha Riether, Hugo Rodallega og John Arne Riise skoruðu úr vítaspyrnum Fulham en það var Norðmaðurinn sem tók síðustu spyrnuna og skaut Lundúnaliðinu áfram í 3. umferðina. Rodallega skoraði hinsvegar markið sem kom Fulham í vítakeppnina.

David Stockdale, markvörður Fulham, gerði útslagið með því að verja eina vítaspyrnu frá leikmönnum Burton Albion.

Tranmere Rovers og Bolton Wanderers gerðu 1-1 jafntefli en Tranmere vann vítakeppnina 4-2. Owain Fon Williams varði vítaspyrnur Bolton-mannanna Andre Moritz og Alex Baptiste.

Yeovil Town og Birmingham City gerðu 3-3 jafntefli en Birmingham vann vítakeppnina 3-2.