Soldado boðinn velkominn á White Hart Lane

„Það er heiður að tilkynna að Tottenham hefur komist að samkomulagi við Valencia um félagaskipti Roberto Soldado," segir á heimasíðu enska úrvalsdeildarfélagsins.

Spænski landsliðsmaðurinn á aðeins eftir að standast læknisskoðun og verður þá orðinn leikmaður Lundúnaliðsins. Kaupverðið hefur ekki verið gefið upp.

Soldado skoraði 80 mörk í 146 leikjum fyrir Valencia frá árinu 2010. Áður lék hann með Getafe þar sem hann raðaði einnig inn mörkunum.

Soldado er uppalinn hjá Real Madrid þar sem hann spilaði með B-liði félagsins. Hann hefur spilað 11 landsleiki og skorað í þeim sex mörk. Hann var með landsliðinu í Álfukeppninni í Brasilíu fyrr í sumar.