Gerrard: "Suarez og Bale eru heitustu bitarnir í dag"

Steven Gerrard, miðjumaður Liverpool, vonast til þess að geta talið Luis Suarez trú um að vera um kyrrt í herbúðum félagsins.

„Gefðu þessu eitt ár í viðbót og sjáum hvaða árangri við getum náð. Þau eru skilaboð mín til Luis," segir Gerrard í viðtali við Telegraph.

Liverpool mætir Olympiakos á laugardaginn í ágóðaleik til heiðurs Gerrard. Löngu er uppselt á leikinn en allur ágóði, um ein milljón punda, verður veittur til góðgerðamála.

„Liverpool þarf að fjárfesta í einum til tveimur heimsklassa leikmönnum ef við ætlum að keppa um efstu fjögur sætin - og halda Suarez," sagði Gerrard.

Gerrard segir Lionel Messi og Cristiano Ronaldo tvo bestu leikmenn í heimi. Suarez deili þriðja sætinu ásamt Gareth Bale.

„Luis og Bale eru tveir heitustu bitarnir á markaðinum í augnablikinu," segir Gerrard. Hann hefur látið hafa eftir sér að Suarez sé besti leikmaður sem hann hafi spilað með.