Wenger: Fótboltaheimurinn orðinn algjörlega galinn

Arsene Wenger, knattspyrnustjóri Arsenal, segir eltingarleik Real Madrid við Gareth Bale hjá Tottenham gera grín að nýjum rekstrarreglum Knattspyrnusambands Evrópu.

Það hefur ekki gengið alltof vel hjá Arsene Wenger að styrkja lið Arsenal í sumar og liðið missti meðal annars af Gonzalo Higuain til Napoli. Hagfræðingurinn er ekki þekktur fyrir að eyða stórum upphæðum í leikmenn og fjölmiðlamenn notuðu tækifærið og spurðu Wenger út í hugsanlega risakaup Real Madrid á Gareth Bale.

„Þetta gerir bara grín af þessu nýju reglum. Á sama ári og nýjar rekstrarreglur UEFA eru teknar í notkun þá er fótboltaheimurinn orðinn algjörlega galinn," svaraði Arsene Wenger.

Real Madrid er á leiðinni að gera Gareth Bale að dýrasta knattspyrnumanni sögunnar og borga meira fyrir hann en fyrir Cristiano Ronaldo sumarið 2009.

„Að sjálfsögðu veltir maður fyrir sér hvaða áhrif þessar nýju reglur hafa á fótboltaheiminn. Við fyrstu sýn er eins og hann sé orðinn enn verri en áður," sagði Wenger. En hvað með kaup Arsenal á nýjum leikmönnum?

„Við erum vissulega undir pressu að eyða peningi í nýja leikmenn en ég lít á þetta meira þannig að við séum undir pressu að eyða skynsamlega í nýja leikmenn. Við viljum eyða peningi í leikmenn sem bæta liðið og það er það mikilvægasta. Það er ekki samasemmerki á milli hárra upphæða og gæða," sagði Wenger.