"Fabregas þarf að ákveða sig“

Gerardo Martino, nýr þjálfari Barcelona, segir að Cesc Fabregas þurfi að taka ákvörðun um það hvort hann vilji ganga í raðir Manchester United.

Englandsmeistararnir hafa lagt fram tvö tilboð í spænska landsliðsmanninn en þeim hefur báðum verið hafnað. Þeir ensku hafa þó ekki gefist upp í eltingaleiknum við Fabregas sem er uppalinn hjá Barcelona en lék lengi með Arsenal.

„Cesc tekur ákvörðunina á endanum en það hvarflar ekki að mér að ég geti ekki treyst á hann í vetur," segir Martino.

Argentínumaðurinn ræddi við fjölmiðla eftir 8-0 sigur á brasilíska liðinu Santos í æfingaleik í gærkvöldi.

„Ég ræddi stuttlega við hann og sagði honum hvað mér fyndist. Hann er einn besti leikmaðurinn í hópnum okkar. Ég held að hann verði um kyrrt."