Þegar búinn að afskrifa næsta tímabil

Ryan Taylor, leikmaður Newcastle, spilar ekkert með liði sínu á næsta tímabil og stefnir að því að snúa aftur í ágúst árið 2014.

Taylor náði að spila aðeins tvo leiki á síðasta tímabili áður en hann sleit krossband í hné í ágúst síðastliðnum. Þegar hann var við það að ná fullri heilsu á ný slitnaði krossbandið á nýjan leik.

Hann fór því í aðgerð hjá Richard Steadman, lækni í Bandaríkjunum sem hefur sérhæft sig í krossbandsslitum íþróttamanna.

„Aðgerðin gekk vel en endurhæfingin mun taka lengri tíma en ég taldi í fyrstu. Ég ætla að halda áfram að berjast og get ekki beðið eftir að klæðast búningi Newcastle aftur,“ sagði Taylor.

„Ég þarf bara að vera þolinmóður. Ég vil þakka öllum fyrir stuðninginn.“