ESB fellur frá umdeildu banni á fjölnota olíukrúsum

Evrópuráðið hefur fallið frá áformum sínum um bann á fjölnota olíukrúsum á veitingahúsum eftir harða gagnrýni tillögunnar.

Til stóð að bannið myndi taka gildi þann 1. janúar 2014 en það hefði falið það í sér að ólífuolía „sem stillt væri upp á borð veitingastaðs“ yrði að vera í forpökkuðum verksmiðjuframleiddum umbúðum með sérstökum stút og merkingum í samræmi við reglugerðir sambandsins.

Þannig myndu skálar og krúsir með alls kyns sósum, einkum og sér í lagi ólífuolíu heyra sögunni til í ýmsum löndum Evrópusambandsins.

Leita annarra leiða

Dacian Ciolos, nefndarmaður í landbúnaðarnefnd ESB tilkynnti um afturhvarf Evrópuráðsins frá banninu en hélt því þó fram að veitingamenn ættu það til að blekkja neytendur með því að hella ódýrri eða gamalli olíu í fjölnota glerílát og láta sem um nýja vöru væri að ræða.

„Við viljum koma í veg fyrir að neytendur séu blekktir,“ sagði Ciolos á blaðamannafundi um röksemdirnar fyrir banninu. Ciolos sagði að bannið „hefði ekki verið sett fram á þann veg að afla nægilegs fylgis,“ og bætti svo við:  „Í ljósi þess hef ég ákveðið að draga tillöguna til baka.“

Evrópuráðið leitar nú annarra lausna til að ná markmiðum sínum í málinu.

Sömu sjónarmið komu til tals með aðrar vörur

Aðspurður hvers vegna ekki hefði verið lagst í það að banna það að vín væri reitt fram með svipuðum hætti sagði nefndarmaðurinn: „Ég hef sjaldan séð opna vínflösku borna fram á borðið mitt.“

Ekki hefur borist í tal hvort réttir evrópksra veitingahúsa, sem gjarnan eru bornir fram á opnum diskum, muni þurfa að vera framreiddir í forpökkuðum verksmiðjuframleiddum umbúðum í þágu neytendaverndarsjónarmiða.

Nánar er fjallað um málið á vef France24.