Ferguson: Það verður engin leið til þess að losna við mig

Sir Alex Ferguson verður víst ekki eilífur í starfi knattspyrnustjóra Man. Utd. Þessi 71 árs gamli Skoti er þegar farinn að pæla í hvað hann ætli sér að gera er hann hættir að stýra liðinu.

Kallinn hefur nú gefið í skyn að hann gæti tekið að sér stjórnunarstöðu hjá félaginu er hann loks stígur niður úr hásætinu.

"Það verður ekki nokkur leið að losna við mig. Ég mun örugglega taka að mér einhvers konar stjórnunarstöðu. Ég hef samt ekki hugmynd um hvenær ég hætti að þjálfa liðið. Það veit enginn og það er líka alveg klárt að enginn læknir mun segja mér hvenær ég eigi að hætta," sagði Ferguson.

Skotinn býst við því að fá að ráða einhverju um hver verði arftaki hans.

"Þeir munu spyrja mig ráða en á endanum verður það félagsins að taka ákvörðun en ekki mín."