Ferguson: Þetta verður ótrúlegur leikur

Sir Alex Ferguson, knattspyrnustjóri Manchester Untited, telur að lið hans sér klárt í síðari leikinn gegn Real Madrid í 16-liða úrslitum Meistaradeildar Evrópu. Leikurinn fer fram á Old Trafford á þriðjudaginn næstkomandi.

Manchester United vann frábæran sigur á Norwich í gær 4-0 og á sama tíma vann Real Madrid Barcelona 2-1 í spænsku úrvalsdeildinni. Liðin mæta því bæði til leiks með mikið sjálfstraust.

„Þetta verður ótrúlegur leikur milli tveggja stærstu félagsliða í heiminum," sagði Ferguson við blaðamenn ytra.

„Það verða miklar tilfinningar í leiknum og andrúmsloftið á Old Trafford verður líklega ólýsanlegt. Ég tel að bæði lið eigi eftir að skora en vonandi skorum við bara fleiri mörk en Real Madrid."

„Við erum að spila óaðfinnanlega um þessar mundir og stemmningin í hópum er frábær. Það skiptir engu máli hvaða leik við erum að fara spila, okkur hlakkar alltaf jafn mikið til."