Laudrup: Við gerum bara eins og Barcelona

Michael Laudrup, knattspyrnustjóri Swansea, ætlar ekki að stækka leikmannahópinn sinn fyrir næsta tímabil þrátt fyrir að Evrópukeppnin bætist þá við á þétta dagskrá velska félagsins. Swansea tryggði sér sæti í Evrópudeildinni með sigri í enska deildarbikarnum á dögunum.

„Þú verður aldrei með 27 leikmann á sama getustigi og það eru því alltaf fimm eða sex leikmenn sem fá aldrei að spila," segir Michael Laudrup.

„Við getum bara skoðað leikina okkar í vetur. Við vorum alltaf með samkeppnishæft lið, líka þessa rúmu tvo mánuði þegar við spiluðum á þriggja daga fresti," sagði Michael Laudrup og danski stjórinn horfir síns gamla félags, Barcelona.

„Barcelona spilaði eitt árið með 19 menn í aðalliðinu og þar á meðal voru nokkrir ungir leikmenn. Þeir spiluðu þriðja hvern dag og þetta gekk upp hjá þeim," sagði Laudrup. Hann ætlar sér að hafa 22 manna leikmannahóp á næsta tímabili.