Enskir fjölmiðlar segja Rooney á útleið

Ensku blöðin eru uppfull af fréttum um Wayne Rooney og framtíð hans hjá Manchester United.

Daily Mail, Daily Star, Mirror og The Times eru meðal þeirra dagblaða sem slá þessu upp í blöðum morgundagsins.

Wayne Rooney var óvænt settur á bekkinn þegar að United mætti Real Madrid í síðari viðureign liðanna í 16-liða úrslitum Meistaradeildar Evrópu í vikunni.

United er nú sagt reiðubúið að selja leikmanninn í sumar en upphæðir á bilinu 20-35 milljónir punda eru nefndar.

Rooney óttast sömu örlög David Beckham hlaut fyrir áratug síðan. Þá var hann settur á bekkinn fyrir síðari leik United gegn Real Madrid í Meistaradeildinni en Beckham var seldur til Madrídinga aðeins átta vikum síðar.

Alex Ferguson, stjóri United, tilkynnti leikmönnum byrjunarlið sitt tveimur tímum fyrir leikinn gegn Real á þriðjudaginn. Rooney mun hafa tekið fregnunum á yfirvegaðan máta en lýst svo vonbrigðum sínum við liðsfélaga sína þegar Ferguson var farinn.

Rooney á rúm tvö ár eftir af samningi sínum en hann verður 28 ára á þessu ári. Cristiano Ronaldo, sem fór frá United til Real Madrid árið 2009, hefur verið orðaður við United á nýjan leik.

Rooney hefur verið orðaður við franska liðið PSG undanfarnar vikur.