Suárez vann sér inn veglega launahækkun

Luis Suárez, leikmaður Liverpool, fékk veglega launahækkun á dögunum samkvæmt frétt Guardian sem hefur heimildir fyrir því að Úrúgvæmaðurinn sé nú að fá meira en hundrað þúsund pund á viku sem eru um 19 milljónir íslenskra króna.

Sumir enskir miðlar halda því meira að segja fram að launin hafi hækkað um 40 þúsund pund eða um 7,6 milljónir á viku. Suárez sé því hér eftir að fá 120 þúsund pund á viku eða tæpar 23 milljónir í íslenskum krónum.

Luis Suárez skrifaði undir nýjan samning við Liverpool síðasta sumar sem skilaði honum 80 þúsund pundum á viku en það var frammistöðuklausa í þessum samningi.

Suárez er nú búinn að skora 21 deildarmark á tímabilinu og er orðinn markahæstur í ensku úrvalsdeildinni. Tuttugasta markið kom umræddri launahækkun af stað.

Suárez verður þar með fyrsti leikmaðurinn sem nýtur góðs af slíkum frammistöðubónus sem nýir eigendur Liverpool í Fenway Sports Group hafa sett á laggirnar.

Þessi launabónus á að virkja hvetjandi á leikmenn og hjálpa til að koma í veg launaöfund meðal leikmanna liðsins því allir eiga nefnilega möguleika á að hækka núverandi laun sín með því að standa sig betur inn á vellinum.