Ferguson: Rooney verður áfram leikmaður Manchester United

Wayne Rooney verður áfram leikmaður Manchester United á næsta tímabili en þetta staðfesti knattspyrnustjórinn Sir Alex Ferguson á blaðamannafundi fyrir bikarleikinn á móti Chelsea á sunnudaginn.

Það hafa verið endanlausar vangaveltur um framtíð Wayne Rooney eftir að hann komst ekki í byrjunarlið Ferguson fyrir leikinn mikilvæga á móti Real Madrid í sextán liða úrslitum Meistaradeildarinnar á þriðjudaginn.

Rooney kom ekki inn á fyrr en 17 mínútum fyrir leikslok og það þótti mörgum skrýtið að enski landsliðsmaðurinn væri ekki nógu góður fyrir leik sem þennan.

Sir Alex Ferguson tjáði sig ekkert við fjölmiðla eftir tapið á móti Real Madrid og stóð því í fyrsta sinn fyrir framan blaðamenn í dag.

Ferguson sagði auk þess að Rooney mun fá hlutverk í bikarleiknum á móti Chelsea á sunnudaginn.

„Rooney verður hérna áfram. Ég get lofað ykkur því. Það er ekkert í gangi á milli mín og Rooney og þessar vangaveltur í blöðunum er algjört rugl," sagði Sir Alex Ferguson á fundinum.

Hann vildi þó ekki segja hvort að Rooney yrði í byrjunarliðinu. „Af hverju ætti ég að hjálpa mótherjum okkar. Við gerum ekki slíkt," sagði Ferguson.