Ferguson: Rooney fer hvergi

Miklar vangaveltur hafa verið um framtíð framherjans Wayne Rooney hjá enska úrvalsdeildarliðinu Manchester United eftir að Rooney var settur á bekkinn fyrir leik enska toppliðsins gegn Real Madrid í Meistaradeild Evrópu í fótbolta í vikunni.

Sir Alex Ferguson knattspyrnustjóri Manchester United valdi að byrja leikinn með Robin van Persie og Danny Welbeck saman í fremstu víglínu.

„Hann verður hér á næsta ári, ég lofa þér því,“ sagði Ferguson spurður hvort þetta þýði að Rooney sé á leið frá félaginu næsta sumar.

„Það sem er skrifað um þetta í blöðunum er algjör þvæla. Það eru engin vandamál á milli okkar Rooney. Það er ekkert hæft í því að við tölum ekki saman á æfingavellinum.

„Það eru engin vandamál okkar á milli og hann mun koma við sögu á sunnudaginn,“ sagði Ferguson en Manchester United mætir Chelsea í átta liða úrslitum enska bikarsins á morgun sunnudag.

„Wayne skildi vel af hverju hann byrjaði ekki leikinn. Þetta var taktísk ákvörðun og við hittum á rétta taktík í leiknum. Það gerist ekki alltaf en það gerðist á þriðjudaginn.

„Danny Welbeck er okkar besti leikmaður til að leika tvöfalt hlutverk. Við urðum að koma í veg fyrir að Xabi Alonso næði að stjórna leiknum og það gerði Danny auk þess að geta farið fram sem sókndjarfur leikmaður,“ sagði Ferguson sem vill ekkert gefa upp um það hvort Rooney byrji leikinn gegn Chelsea.

„Af hverju ætti ég að hjálpa einhverjum með því að segja þeim liðið okkar. Við gerum það ekki. Wayne þarf að spila mikinn fótbolta og þannig hefur hann alltaf verið,“ sagði Ferguson að lokum.