Swansea deildarbikarmeistari eftir stórsigur

Swansea varð í dag deildarbikarmeistari í fyrsta sinn eftir stórsigur gegn Bradford City, 5-0 á Wembley. Bradford átti aldrei möguleika gegn sterku liði Swansea sem réðu ferðinni allan tímann.

Nathan Dyer kom Swansea yfir á 16. mínútu en hann átti eftir að koma mikið við sögu í leiknum. Michu skoraði annað mark Swansea á 40. mínútu og staðan þá vænleg fyrir liðið frá Wales.

Á 47. mínútu var Dyer aftur á ferðinni og á 59. mínútu fékk Swansea dæmda vítaspyrnu. Matt Duke, markvörður Bradford fékk að líta rauða spjaldið fyrir að fella Jonathan de Guzman í upplögðu marktækifæri. De Guzman skoraði úr vítaspyrnunni en Dyer reyndi ítrekað að fá að taka spyrnuna til að fullkomna þrennu sína. Hann reifst við liðsfélaga sína í nokkrar stund og var atvikið frekar vandræðalegt fyrir Dyer.

De Guzman skoraði lokamark leiksins á 90. mínútu og lokatölurnar því 5-0 fyrir Swansea. Þetta er fyrsti stóri titillinn hjá Swansea sem lék í fyrsta sinn í ensku úrvalsdeildinni á síðustu leiktíð.