Stuðningsmenn Man. Utd líkja Carrick við Scholes

Miðjumaðurinn Michael Carrick hjá Man. Utd er afar vinsæll hjá stuðningsmönnum félagsins. Þeir sungu um helgina söngva þar sem þeir líktu Carrick við goðsögnina Paul Scholes.

Carrick, sem hefur byrjað alla deildarleiki nema tvo í vetur, viðurkenndi að hafa komist við er hann heyrði söngvana.

"Scholes er goðsögn og þetta var því afar fallegt að heyra. Það er alltaf gott að vera líkt við slíka leikmenn. Menn verða ekki mikið betri en Scholes," sagði Carrick.

"Að fá að æfa með honum og læra á hverjum degi eru forréttindi. Það hefur hjálpað mér að verða betri. Hann veit það kannski ekki en hann hefur hjálpað mér gríðarlega mikið."