Moyes: Fellaini þarf að taka upp hugarfar Messi

David Moyes, knattspyrnustjóri Everton, segir stjörnuleikmann sinn Marouane Fellaini fá ekki nægjanlega vörn inn á vellinum en að belgíski miðjumaðurinn verði að bregðast við því með því að nálgast leikinn eins og Lionel Messi hjá Barcelona.

„Ég er alltaf að segja við hann: Horfðu á Lionel Messi sem er sparkaður niður í hverri viku. Það vilja allir sparka hann niður því það er eina leiðin til þess að stoppa hann," sagði David Moyes við BBC og bætir svo við.

„Það sem Messi gerir hinsvegar er að standa upp brosandi og halda svo áfram. Ég hef ráðlagt Fellaini að taka upp hugarfarið hans Messi," sagði Moyes.

Marouane Fellaini skoraði átta mörk í fyrstu þrettán deildarleikjum tímabilsins en hefur síðan aðeins náð að skora tvö mörk í síðustu níu leikjum.