Villas-Boas: Bale er hrikalegur

Andre Villas-Boas, knattspyrnustjóri Tottenham, var að sjálfsögðu afar ánægður eftir 3-2 sigur Tottenham á West Ham í kvöld en varamaðurinn Gylfi Þór Sigurðsson og Gareth Bale tryggðu liðinu sigur eftir að West Ham komst yfir á lokakafla leiksins. Sigurmark Bale var glæsilegt.

„Gareth Bale er ótrúlegur og með súper hæfileika. Við höfðum séð hann komast á annað plan á þessu tímabili. Hann er sá sem gerir út um alla leiki en Jussi Jaaskelainen var samt maður leiksins," sagði Andre Villas-Boas.

„Bale er í heimsklassa. Leikmenn eins og hann taka ábyrgðina á úrslitastundum og hann er hrikalegur þessa dagana," sagði Villas-Boas.

„Hann nýtur þess að spila fótbolta og þegar þú sérð hann svona kátan inn á vellinum er von á einhverju góðu. Það er ekki langt upp í annað sætið og við eigum möguleika á því að vinna Arsenal á sunnudaginn kemur," sagði Villas-Boas.

„Norður-London derby-leikurinn verður mjög ástríðuþrunginn og það væri stórt skref hjá okkur að komast sjö stigum á undan Arsenal. Við vitum að við þurfum meira forskot til að halda þeim fyrir aftan okkur," sagði Villas-Boas.