Benitez lenti í rifrildi við leikmenn sína

Stuðningsmenn Chelsea neita að samþykkja Rafa Benitez sem stjóra Chelsea og nú virðist hann vera að missa klefann. Samkvæmt fréttum lenti hann í harkalegu rifrildi við leikmenn sína í gær.

Chelsea tapaði gegn Man. City á sunnudag og Benitez tók þá á teppið í gær. Sagði meðal annars við leikmennina að viðhorf þeirra hefði kostað marga stjóra félagsins starfið. Lét þá svo heyra það fyrir að leggja sig ekki nægilega fram.

Benitez fékk aftur á móti blauta tusku í andlitið þegar einn af reyndari leikmönnum liðsins svaraði fyrir sig og sagði að gengið gæti verið stjóranum sjálfum að kenna.

John Terry tók svo hanskann upp fyrir leikmennina. Ef eitthvað er að marka þessi tíðindi er slæmt ástand í herbúðum Chelsea.