Er Bale orðinn einn sá besti í heimi? - mörkin tala sínu máli

Gareth Bale hefur farið á kostum með Tottenham í síðustu leikjum og skoraði stórkostlegt sigurmark á Upton Park í gær. Menn hafa verið duglegir að hrósa velska landsliðsmanninum eftir hvern leik upp á síðkastið og ekki að ástæðulausu.

Gareth Bale hefur skorað sex mörk í síðustu fjórum deildarleikjum og alls 15 mörk í 23 deildarleikjum á tímabilinu. Það er hægt að sjá myndband með öllum deildarmörkum hans á tímabilinu með því að smella hér fyrir ofan.

Það hefur reyndar bara einn annar leikmaður skorað fyrir Tottenham í síðustu fjórum deildarleikjum og það er okkar maður Gylfi Þór Sigurðsson. Þegar Gylfi jafnaði í gær þá var Bale búinn að skora fimm síðustu deildarmörk Tottenham-liðsins.

Gareth Bale er þegar búinn að bæta sitt persónulega met um sex mörk en hann skoraði 9 mörk í 36 deildarleikjum í fyrra. Bale er aðeins 23 ára en er samt á sínu sjötta tímabili með Tottenham.